Tuesday, March 20, 2018

សម្រស់ធម្មជាតិឆ្នេរសមុទ្រខេត្តព្រះសីហនុ

ឆ្នេរ​​សមុទ្រ​​ក្រុង​​ព្រះសីហនុ​ ​គឺ​​​ជា​​​ឆ្នេរ​ដែល​​មាន​​ទេសភាព​​​ស្រស់​បំព្រង និង​មាន​ខ្សាច់​​សមុទ្រ​​សស្គុះ ព្រម​ទាំង​ខ្យល់​អាកាស​ លាយ​ឡំ​ទៅនិង​​​ទឹក​​រលក​បក់​បោក​គួរ​ជា​ទី​គយ​គន់​។

អ្នក​​​​ទេសចរណ៍ក្នុង និងក្រៅស្រុក​តែង​តែ​លំហែកាយ តាម​ឆ្នេរ​ខ្សាច់​ដ៏ស្រស់​ស្អាត ខ្លះ​គេង​​សំដិល​ហាល​ថ្ងៃ​​បន្ទាប់​​ពី​ចុះ​ងូត​ទឹក​សមុទ្រ ខ្លះ​ទៀត​​អង្គុយ​លើ​កៅ​អី​ទម្រេត​អានសៀវភៅ ស្រូប​យក​ខ្យល់​អាកាស​បរិសុទ្ធ រួមនិងសម្លេង​ទឹក​សមុទ្រ​បោក​បក់​បង្កើត​ជាចង្វាក់ភ្លេងធម្មជាតិ​ដើម្បីបំពេរ​អារម្មណ៍​ដល់​ភ្ញៀវ​ទេសចរណ៍​ជាតិ​និង​អន្តរជាតិ។ ​ជាងនេះទៅទៀត អ្នក​រស់​នៅ​ក្រុង​ព្រះសីហនុ​​តែង​តែ​ចូលចិត្ត​កំសាន្តតាមរយៈការ​​ជិះ​ទូក​​​យន្តស្ទូចត្រីតាមកោះ ឬឈរស្ទូចត្រីតាមឆ្នេរ​សមុទ្រដើម្បីកំសាន្ត​អារម្មណ៍បន្ទាប់ពី​ការងារ​ប្រចាំ​ថ្ងៃ​របស់ពួកគាត់ត្រូវ​បាន​បញ្ចប់។​

ខ្ញុំបាទនៅចាំបានថា កាល ពីឆ្នាំ ១៩៨៥ មានវិស្វកររុស្ស៊ីមួយក្រុម​បាន​មក​ស្នាក់​នៅ​សណ្ឋាគារ​៧ជាន់ ដើម្បីធ្វើការស្រាវជ្រាវរុករក​រ៉ែប្រេង និង រ៉ែផ្សេងៗ នៅ​តាម​បណ្តា​កោះ​ដូចជា​កោះតាង កោះរុង កោះរ៉ុង​សន្លឹម ។ល។ ពួកគាត់តែងតែ សំដិល ហាល ថ្ងៃ ជារៀង​រាល់​ពេល​ព្រឹក។
បុរសជន​​ជាតិ​រុស្ស៊ី​ម្នាក់​ដែល​មាន​អាយុប្រហែល៤៥ឆ្នាំ នា​សម័យ​នោះ​បាន​ប្រាប់​ខ្ញុំ​តាម​រយៈ​អ្នក​បក​ប្រែ​ភាសារុស្ស៊ីថា ឆ្នេរ​សមុទ្រ​ក្រុង​កំពង់សោម (ឈ្មោះកាល​ពី​សម័យ​មុន) ពិតជាស្អាត និង​ទាក់​ទាញ​ខ្លាំងណាស់។ គាត់និយាយបណ្តើរ ឱន​ចាប់​ខ្សាច់​សស្គុះ​បណ្តើរ​ដោយ​បង្ហាញ​ទឹកមុខ​ស្រស់​ញញឹម រួចបញ្ជាក់ថា គឺជាខ្សាច់ស្អាត រីឯឆ្នេរសមុទ្រទៀតសោតក៏គ្មានភក់ របាប់ ដែល​ធ្វើ​ឱយ​ប្រឡាក់​ដៃជើងឡើយ។​ ខ្ញុំក៏ចាប់គិតថា តើសម្តីរបស់បុរសនោះពិតដែរឬទេ ព្រោះ​ខ្ញុំ​មិន​ធ្លាប់​បាន​ទៅ​កំសាន្ត​ប្រទេសឡើយ​នាសម័យ​នោះ ហើយ​ខ្ញុំ​ហាក់​ដូច​ជា​មានមោទនៈលើ​ប្រទេសរបស់​ខ្លួន​យ៉ាង​ខ្លាំង​បន្ទាប់​ពី​បានលឺវាចាររបស់ជន​បរទេស​នោះមក បើ​ទោះ​បី​ខ្ញុំ​​មិន​ធ្លាប់​បានឃើញ និង​ទៅដល់បណ្តា​ឆ្នេរ​សមុទ្រ​នៅ​តាម​បណ្តា​ប្រទេស​​ជា​ច្រើន​នៅ​លើ​សាកល​លោក​នេះក៏​ដោយ។

កាល​​​ពី​​​សម័យ​​ទសវត្សរ៍​៨០ ចំនួន​ភ្ញៀវ​​​ទេសចរណ៍​​មក​​លេង​ក្រុង​កំពង់​សោម​មាន​ចំនួន​តិច​តួចស្តួចស្តើង​ណាស់​ ព្រោះ​​​ការ​​ធ្វើ​​ដំណើរ​ពី​ខេត្ត​មួយ​​ទៅ​​ពី​ខេត្ត​មួ​យ ពី​​ក្រុង​ទៅ​ខេត្ត​គឺ​​អស្ថេរភាព​​នៅ​​ឡើយ​។​​​ អ្នក​​​ធ្វើ​ដំណើរ​​តាម​​រថយន្ត​ប្រភេទ​ កាម៉ាស ហ្វុយហ្សូ ឬ​​រថយន្ត​ក្រុង​ប្រឈម​មុខ​និងក្រុមខ្មែរ​ក្រហម ឬ​ជន​ក្លែង​បន្លំ ដើម្បី​ពួន​ស្ទាក់​បាញ់​រថយន្ត ម្យ៉ាងវិញទៀតជំនាន់នោះមិនសូវមានរថយន្តជាលក្ខណៈ​គ្រួសារនៅឡើយទេ នៅ​រៀង​រាល់​ចុង​សប្តាហ៍កម្រនិងមានភ្ញៀវទេសចរណ៍ក្នុងស្រុកមក​លេង​ក្រុង​កំពង់សោមណាស់ លើក​លែង​តែ​រដូវបុណ្យទានតែប៉ុណ្ណោះ។

នៅ​ប៉ុន្មាន​ឆ្នាំ​ចុង​ក្រោយ​នេះ មាន​អ្នក​​វិនិយោគ​ទុន​មក​ពី​ប្រទេស​ចិន​ជា​ច្រើន​ ដើម្បី​វិនិយោគ​​នៅ​ខេត្ត​ព្រះសីហនុ​ រីឯអគារធំខ្ពស់ៗ ក៏ចាប់​ផ្តើម​សាង​សង់​ឡើង​ជា​បណ្តើរៗ។ ដី​​ធ្លី​នៅ​តំបន់​នោះ​មួយ​ចំនួន​ធំ​ក៏​ចាប់​ផ្តើម​មាន​តម្លៃ​ខ្ពស់ រីឯ​អ្នក​ដែល​មាន​ដី​នៅ​ទី​ក្រុង​ព្រះសីហនុ​ក៏​ខ្លះ​ក៏​នាំ​គ្នា​លក់​ដី ឬ​ជួល​ទីតាំង​របស់​ខ្លួន​ទៅ​ឲ្យ​វិនិយោគិនចិន ហើយ​ខ្លួន​ក៏​យក​ថវិកាដែល​ទទួល​បាន​ពី​ការលក់ ឬ​ជួល​ដី​នោះ​ទៅ​ទិញ​ដី​ដែល​នៅ​ក្បែរជ្រាយ​ៗ​ក្រុង រហូត​ដល់​ស្រុក​ព្រៃនប់ និង​ខេត្ត​ជិត​ៗ​ដូច​ជាខេត្ត​កំពត​ជា​ដើម។ នៅ​ពេល​ខាងមុខនេះ  រាជរដ្ឋាភិបាល​កម្ពុជា​មាន​គម្រោង​សាង​សង់​ផ្លូវ Highway និង​ផ្លូវអយស្ម័យយានដ៏​ទំនើបពី​ភ្នំពេញ​ឆ្ពោះទៅ​ខេត្ត​ព្រះសីហនុ​​ដែល​​ជា​តំបន់​ទេសចរណ៍​ខ្នាតអន្តរជាតិ។ អ្វី​ដែល​ខ្ញុំ​សោក​ស្តាយ​នោះ​គឺ​ខ្ញុំ​មិន​មាន​ម៉ាស៊ីន​ថត​រូប​ដើម្បី​ផ្តិត​ទុក​នូវ​ទេសភាព​កាល​ពី​អតីតកាល​ (កាលមិន​ទាន់មានការអភិវឌ្ឍន) ដើម្បី​យក​ទុក​បង្ហាញ​ដល់​កូនៗ ចៅៗ​ជំនាន់​ក្រោយបាន​យល់ដឹង​អំពី​ការវិវត្តន៍ចាប់តាំងពីទសវត្សរ៍៨០​រហូត​មក​ដល់បច្ចុប្បន្ន​នេះ។

No comments:

Post a Comment